Die Sleutel tot Sukses De Goede Hoop S-Leer Sol-Tech AfriForum Jeug Akademia

Solidariteit is al sedert 1902 jou bondgenoot in die werkplek en sy planne vir 'n vry, veilige en voorspoedige toekoms is groot. Solidariteit glo dat sy lede in 'n onsekere ekonomie deur kennis beskerm kan word en dat 'n toekoms vir jong Suid-Afrikaners oop geleer kan word. Daarom beywer Solidariteit homself om opleidingsinstellings te bly bou asook om sover moontlik, opleidingsgeleenthede vir die lede van die gemeenskap te skep. Solidariteit koester en bevorder opleiding deur middel van die Solidariteit Boufonds asook die Solidariteit Helpende Hand Studiefondssentrum. Daar is tans talle faktore wat die toekoms van huidige opleidingsinstansies bedreig en dus 'n onsekere prentjie vir die jongmense van vandag skep. Die Boufonds wat deur Solidariteit geïnisieer is se hoof doel is om om te sien na die behoefte van sy mense en hul toekoms, deur instansies te bou waarbinne goeie gehalte tersiêre opleiding asook opleiding in skaars vaardighede aan studente gebied kan word. Sol-Tech is slegs een van die instansies wat deur die Boufonds tot stand gebring is, en vandag staan dié voorkeur instelling bekend as die grootste Afrikaanse privaat beroepsopleidingskollege in Suid-Afrika. Die 2020 toekomsplan van die Solidariteit Beweging sluit groot ontwikkelings vir onderwys van laerskool- tot universiteitvlak in. Deel van die beplanning behels die bou van 'n nuwe opleidingskampus wat die tuiste van verskeie opleidingsinstellings sal wees. Die Solidariteit Helpende Hand Studiefondssentrum wat voorheen as die Afrikaanse Beursinstituut bekend gestaan het, is die ander manier waardeur Solidariteit in jongmense se toekoms belê. Dié sentrum het ten doel om Solidariteit-lede en hul kinders ten opsigte van finansiële hulp vir tersiêre opleiding by te staan sodat hulle ook die geleentheid het om die nodige kennis te bekom. Oor die laaste 8 jaar het die Studiefondssentrum met 'n totaal van R126 miljoen vir 6 981 studente die kans op tersiêre onderrig gebied. Die suksesverhale van Akademia, Sol-Tech en die Solidariteit Helpende Hand Studiefondssentrum is 'n getuienis dat Solidariteit 'n wenresep het vir wêreldgehalte onderrig en opleiding. 'n Sleutel wat die deure tot 'n blink toekoms sal oopsluit. Sluit by Solidariteit aan en SMS die woord BOUSAAM na 34802 (R1/SMS) of laat weet ons waar jy sal wil bou by https://solidariteit.co.za/bousaam/#meningspeiling    

Die gesig van universiteite soos ons dit ken, het met die verloop van tyd verander. Die instelling van rassekwotas, die uitskakeling van Afrikaans en die afskaffing van tradisies het die universiteitskoshuise so ver getransformeer dat daar nie werklik meer ruimte is vir die studente wat opsoek is na 'n Afrikaanse studentelewe nie. In onstuimige omstandighede is dit belangrik om skepe van uitnemendheid en eilande van selfstandigheid te hê. Daarom het die burgerregte-organisasie AfriForum , De Goede Hoop-koshuis as 'n selfstandige eiland tot stand gebring om weer 'n ruimte vir Afrikaans in die onstuimige omstandighede van veranderende universiteite te skep. De Goede Hoop is soveel meer as net 'n koshuis in die hartjie van Pretoria – dit is 'n tuiste vir dinamiese studente wie se hart Afrikaans klop. Dié moderne, privaat koshuis vir beide mans en vroue, streef om 'n veilige ruimte vir studente te skep waarbinne hulle vrylik en met selfvertroue hul studentelewe kan geniet. De Goede Hoop het hul deure in Januarie 2017 geopen en spog met verblyf vir 99 studente. Dié koshuis stap alreeds die pad na sukses in sy eerste bestaansjaar met 66 gevulde kamers. Volgens Stefan Pieterse, huisvader van De Goede Hoop, het hulle reeds 27 aansoeke vir volgende jaar. “Ons het geen twyfel daaraan dat ons volgende jaar nie stampvol gaan wees nie,” sê die trotse huisvader. Alhoewel De Goede Hoop deur  AfriForum geïnisieer is, staan dié instelling heeltemal los van die Beweging. Die waarde van De Goede Hoop lê daarin dat dit waarin hulle glo, in terme van taal en geloof, 'n ideologiese ruimte skep waarin hulle hulleself kan uitleef. Dié lewende monument vir studentwees bou voort op 'n kultuur van vooruitgang en speel 'n groot rol in opleiding. Dit is 'n tuiste waar studente deel kan wees van 'n kultuurryke ervaring en waar medegelowiges saam kan woon, studeer en kuier. Sms die woord BOUSAAM na 34802 (R1) en gaan neem deel aan ons meningspeiling oor waar jy graag sal wil bou: https://solidariteit.co.za/bousaam/

Lize-Mari Labuschagne   Die Solidariteit Beweging bied 'n geleentheid aan hul lede om hulle vermoëns en vaardighede tot so 'n mate te ontwikkel dat hulle hul droom werk kan kry en ook behou, om sodoende vry, veilig en voorspoedig te kan lewe. S-leer help jou om loopbaandoelwitte te bereik deur professionele persone te bemagtig met VPO-punte (voortgesette professionele ontwikkeling – in Engels  CPD-punte) en persoonlike ontwikkeling. S-Leer help jou om jou roeping uit te leef en vir jouself 'n goeie werk te skep. Met tegnologie het tradisionele opleiding onherkenbaar verander. S-leer gebruik dieselfde model en tegnologie as Akademia, waar studente oor die hele land heen, deur middel van ’n digitale klaskamer met interaktiewe video-tegnologie deel van ’n opleidingsessie kan wees. S-leer gebruik ook ander maniere om dit vir elkeen se leerbehoeftes en omstandighede gepas te ontwerp. Saam met slimtegnologie bied S-leer aan meer mense opleidingsgeleenthede. Volgens besturende direkteur Leana Leonard is S-Leer bied 'n wonderlike geleentheid om mense se vaardighede te ontwikkel. “Ons lê letterlik stene wat aan iemand se loopbaan en toekoms bou, en dan versterk ons dit met ons unieke S-Leer-sement: Twee dele kennis, een deel gasvryheid en een deel pret, want leer wat lekker is, gee kennis wat sterker is.” Seminare en kursusse wat verwag kan word van S-Leer:

• Etiek en welstand
• Hofpraktyke
• Trauma-werksessies
• Woordvoerdersopleiding
• Ontdek jou handelsmerk
• Praktykadministrasie en -bestuur
• Die regte van kinders in gesondheidsorg
• Substansprobleme – meer as 'n mond vol

SMS die woord BOUSAAM na 34802 (R1) en gaan neem deel aan ons meningspeiling oor waar jy graag sal wil bou: www.solidariteit.co.za/bousaam/

Francois Redelinghuys Alhoewel ek Sol-Tech, Solidariteit se eie tegniese opleidingskollege in Kirkney, Pretoria al male sonder tal besoek het, staan ek elke keer stom-verbaas oor die indrukwekkende groei en vooruitgang wat die kollege van besoek tot besoek behaal het. Dit is na my mening veilig om te sê dat Sol-Tech besig is om een van dié mees moderne en vinnig groeiende opleidingskolleges vir ambagslui in Suid-Afrika te word. Hoewel Sol-Tech slegs ongeveer 10 jaar bestaan, bied die kollege opleiding in skaars vaardighede aan sowat 1 000 voltydse studente, wat ondermeer 'n meulmaker, passer-en-draaier en gereedskapmaker insluit, en hierdie beroepsrigtings vul groot leemtes in die Suid-Afrikaanse arbeidsmark. Dit is egter die wyse waarop Sol-Tech se studente opgelei word, waar die geheim van die kollege se sukses lê. Die dae waar gereedskap en ander ambagsverwante produksie slegs per hand gedoen word is verby. Daar is 'n toenemende tendens waar gesofistikeerde masjinerie in die ambagswêreld gebruik word om in pas met die vraag van die groeiende mark te bly en dit is hier waar Sol-Tech homself van ander tegniese opleidingskolleges onderskei. Sol-Tech is voortdurend besig om die nuutste praktyke en toerusting wat in die industrie gebruik word aan te skaf en in gebruik te neem sodat studente reeds op opleidingsvlak aan hierdie tipe toerusting blootgestel word. Studente het ook die voordeel om op baie van hierdie hoogs-gespesialiseerde toerusting simulasies te hardloop om hulle sodoende op die beste manier denkbaar op te lei en voor te berei. Sol-Tech studente is weens die opleiding wat hul ontvang ongelooflik gesog wanneer hulle die arbeidsmark betree en dit is dus nie verbasend dat 94,7% van Sol-Tech-studente tans betrekkinge beklee nie. Met Sol-Tech-dosente wat hul passie in Afrikaans uitleef het Sol-Tech-studente elke moontlike pyl in hul koker om van hul loopbane 'n reuse sukses te maak. In 'n arbeidsomgewing waar werkloosheid veral onsolider jongmense hoogty vier, rus Sol-Tech jongmense toe om in 'n kompeterende arbeidsmark met groot sukses mee te ding. Bou saam met Solidariteit aan kwaliteitinstellings soos Sol-Tech. SMS BOUSAAM na 34802 of besoek www.solidariteit.co.za/bousaam.  

AfriForum Jeug is 'n studente-organisasie en die amptelike jeugvleuel van AfriForum, die burgerregte-inisiatief wat deur die Solidariteit Beweging gestig is. AfriForum Jeug is ook die mees snelgroeiende jeugorganisasie in Suid-Afrika. Hulle poog om selfstandigheid onder jong Afrikaners te bevorder en die realiteite in Suid-Afrika te beïnvloed deur veldtogte te dryf en aktief standpunt in te neem vir jongmense se burgerregte. AfriForum Jeug bied gereeld sosiale geleenthede, gesprekke en opleidingsessies aan. As lid kan jy deel wees van proaktiewe aksies en veldtogte oor sake wat jou toekoms bepaal. Die omgewing waarin studente beweeg blyk 'n maklike teiken te wees vir kwaaddoeners en misdadigers en daarom sluit een van hierdie proaktiewe aksies in om studente te bemagtig met die nodige kennis en vaardighede sodat hulle bewus kan wees van hulle omstandighede. Henk Maree, hoof van AfriForum Jeug glo dat volhoubare bewusmaking die sleutel is om die jeug te beskerm. Opleidingsessies rondom veiligheid word vir studente gereël om kwessies soos verkragting en hoe vrouens hulleself kan beskerm teen hierdie voorvalle aan te spreek. In 'n onlangse voorval met onwettige optogte op die Universiteit van Vrystaat se kampus waar studente se veiligheid in gedrang was, het AfriForum Jeug hulp ontbied van AfriForum buurtwagte om hierdie studente veilig uit die koshuise te begelei. Lidmaatskap van AfriForum Jeug is gratis en enigiemand wat met AfriForum Jeug se beleid saamstem, mag aansluit. Jong werkendes word ook aangemoedig om by AfriForum Jeug se dorpstakke aan te sluit. AfriForum Jeug dryf ook veldtogte om skoolgaande jeug van hul regte bewus te maak en om gehalte-onderwys te bevorder. AfriForum Jeug dryf vyf aktiewe veldtogte naamlik:

• om jongmense van regstellende aksie vry te stel;
• om Afrikaans en moedertaalonderrig te beskerm en te bevorder;
• om politieke inmenging in onderwys te verhoed;
• om jongmense se vermoëns, kennis en vaardighede te ontwikkel;
• en om gesonde studentetradisies te beskerm.

Sms BOUSAAM na 34802 (R1/sms) en kies die temas uit Solidariteit se bouplan wat jou die naaste aan die hart lê en teken dan op om saam te bou by  https://solidariteit.co.za/bousaam/. #BouSaam aan 'n vry, veilige en voorspoedige môre!

Mia Slabbert In Akademia se sesde bestaansjaar is een ding seker: Dié privaat hoër onderwys-instelling bou aan 'n werksmag wat met selfversekerdheid en bekwaamheid by 'n werkplek kan instap. Volgens Paul Vogel, die operasionele bestuurder van Akademia, lê die instelling se groeiende sukses in hul unieke model wat Afrikaanse studente die geleentheid bied om in hul moedertaal te studeer en om klasse nauurs by te woon. “Dit bied vir die student 'n ruimte waar hy of sy kan studeer én terselfdertyd werksondervinding kan opd oen. Vanjaar is daar oor die 730 studente wat by Akademia studeer. Die meeste van ons studente werk reeds, dus het hulle die voordeel dat hulle na afloop van hul studies reeds werksondervinding het wanneer hulle by 'n werkplek instap,” sê Vogel. Interaktiewe videokonferensie-tegnologie word aangewend om interaktiewe afstandsonderrig-kontaksessies bykans regoor die land moontlik te maak. Dit beteken dat studente voltyds kan werk en dan op voorafgeskeduleerde aande kontaksessies in een van die genoemde sentrums naby aan hul huis kan bywoon. Hierdie kontaksessies word ook opgeneem, en studente kan binne 72 uur ná hul kontaksessie die klas aflaai en op hul eie tyd hersien. In hierdie tye van onsekerheid in ons land se universiteitswese bied Akademia ’n veilige, leervriendelike omgewing waar studente kwalifikasies in verskeie BCom-rigtings kan verwerf. Studierigtings sluit in:

• BCom-grade: Akademia bied reeds geakkrediteerde BCom-grade in Ondernemingsbestuur, Bestuursrekeningkunde, Finansiële Beplanning en in Ekonomie en Regte.

• Gevorderde diplomas: ’n Gevorderde Diploma in Projekbestuur word aangebied vir projekbestuurders in die werkplek wat graag hul formele kwalifikasie wil bekom (hiervoor is ’n driejaardiploma of -graad as voorafkwalifikasie ’n vereiste).

• Hoër Sertifikate:Die Hoër Sertifikaat in Rekeningkunde en Kantooradministrasie (Algemeen / Projekadministrasie) is NQF 5- geakkrediteerde jaarkursusse wat dien as oorbrugging vir Akademia se BCom-graadprogramme.

Akademia het tans 11 studiesentrums oor die land heen waar studente bymekaar kom om lesings by te woon. Die lesings word met behulp van moderne tegnologie vanaf 'n lokaal op die kampus in Centurion na studiesentrums in Pretoria Moot, Pretoria Lynnwood, Centurion, Boksburg, Krugersdorp, Vanderbijlpark, Bloemfontein, die Paarl, Tygervally, Somerset-Wes en in George uitgesaai. “Studente wat by Akademia uitstap, is in der waarheid baie goed toegerus omdat hulle die studiemateriaal, wat dikwels slegs in Engels beskikbaar is, onder die knie kon kry danksy die feit dat dosente dit in Afrikaans kon aanbied en verduidelik,” sê Vogel. Voornemende studente kan ook aansoek doen vir rentevrye studielenings om vir hul studies te kan betaal. Voorts bied Akademia oorbruggingsgeleenthede vir studente wat nie regstreeks kwalifiseer om vir ’n BCom-graad in te skryf nie. Studente kan vir kursusse inskryf om 'n hoër sertifikaat in rekeningkunde of kantooradministrasie (Projekadministrasie) te verwerf. Dié kwalifikasies verleen dan toegang tot graadstudies. Akademia het tydens sy vyfde jaarlikse plegtigheid in April 'n nuwe mylpaal bereik toe dié instelling sy eerste BCom-grade toegeken het. By die geleentheid is 13 grade aan studente toegeken wat in 2014 vir die program BCom Ondernemingsbestuur ingeskryf en dit verlede jaar voltooi het. Benewens die toekenning van die 13 grade in BCom Ondernemingsbestuur, is 14 gevorderde diplomas in Projekbestuur, drie diplomas in Kleinsakebestuur, een diploma in Bemarking, 19 hoër sertifikate in Kantooradministrasie en 26 hoër sertifikate in Rekeningkunde toegeken. “Akademia het die afgelope vyf jaar universiteitsvlakkwalifikasies van hoogstaande gehalte binne die bereik van Afrikaanse studente soos wat nog nooit tevore die geval was nie geplaas. In 2012 het ons met die aanbieding van hoër sertifikate begin en in 2017 ken ons die eerste grade toe,” het Piet le Roux, Akademia se akademiese hoof, gesê. Bou saam met Solidariteit aan kwaliteitinstellings soos Akademia. SMS BOUSAAM na 34802 of besoek www.solidariteit.co.za/bousaam.