- Na aanleiding van die druk wat Solidariteit gedurende 2015 op die GEPF geplaas het oor die toepassing van die “skoonbreukbeginsel”, het die GEPF onderneem om afstand te doen van die stelsel en dit te hersien, deur aan lede die keuse te gee en ook die meer gebruiklike stelsel van verrekening in diensjare as ’n opsie te aanvaar. Die GEPF het onderneem om met Solidariteit te skakel en elke persoon namens wie ons optree se betalings ingevolge die skoonbreukbeginsel te evalueer en te vergelyk met die stelsel van verrekening in diensjare ten einde te bepaal of iemand skade gely het. Nadat Solidariteit litigasie van stapel gestuur het oor die eensydige aanpassings in die formule ten tyde van bedanking voor ouderdom 55 (lees meer hieronder), het die GEPF nou sy onderneming aan Solidariteit oor die skoonbreukbeginsel verbreek. Ons maak nou gereed om ook litigasie hieroor teen die GEPF van stapel te stuur.
- Wat betref die aanpassing in die waardes van die formule wat gebruik word vir die berekening van ’n persoon se bedankingswaarde uit die fonds by bedanking voor ouderdom 55, het die GEPF erken dat daar nie hieroor met arbeid gekonsulteer is nie. Hierdie versuim is hersienbaar ingevolge die Wet op Administratiewe Geregtigheid.
- Sien die aangehegte dokumente wat verder uitwei oor die skoonbreukbeginsel.
- Solidariteit het litigasie teen die GEPF van stapel gestuur met die doel om hierdie besluit te hersien ten einde ons lede en lede wat reeds bedank het en deur die eensydige aanpassing van die formule benadeel is, finansieel te laat vergoed.
- Ons het reeds by die Hooggeregshof vir ’n hofdatum aansoek gedoen om die beregting van die eerste been, ons aansoek om die sertifisering van ’n klasaksie, te laat aanhoor. Die saak behoort vroeg in 2017 ter rolle geplaas te word.
