Solidariteit se Kantoorpraktisynsnetwerk is ʼn gemeenskap wat daarop toegespits is om professionele persone wat dienste in die administratiewe bedryf aanbied met mekaar in kontak te bring, om jong mense ʼn kans op ʼn loopbaan in die beroep te bied en om die waghond te wees wat brandpunte in dié beroep met werkbare oplossings takel. Kantoorpraktisyns voel soms nie na waarde geag nie, maar hulle lewer egter ʼn belangrike rol in die dag-tot-dag-bestuur van enige organisasie. Dit is nou die tyd vir kantoorpraktisyns om persoonlik verantwoordelikheid te neem en om deel te word van ʼn beroepsgemeenskap waar hulle verstaan word, hulle hulle kennis kan deel, hulle hulle vaardighede en kennis kan uitbrei en waar hulle hulleself tot hulle volle potensiaal as spesialis binne die beroep kan vestig.